Журналист хатын һәм аның ун яшьлек улы коточкыч авариядә үлгән
Дагыстан журналистының машинасы Калмыкиядә йөк машинасына бәрелгән.
4 ноябрьдә 20.20 сәгатьтә Калмыкиянең Черноземелье районында юл һәлакәте була. Биредә Дагыстаннан килгән журналист Наталья Захарова һәм аның ун яшьлек улы үлә. Бу турыда «Комсомольская правда» хәбәр итте.
Яшкуль-Комсомольский трассасында «Камаз» белән «Opel Meriva» машиналары бәрелешә. Җиңел машинада Дагыстан дәүләт университетының элеккеге матбугат сәркатибе, журналист һәм җәмәгать эшлеклесе Наталья Захарова белән аның улы була.
Бала урында ук үлә, машина белән идарә итүче Наталья Захарова имгәнә һәм хастаханәдә вафат була.
Мәскәүдә Натальяның балигъ булмаган кызы Варя кала. 14 яшьлек кыз башкалада әбисе белән яши.
Захарова Дагыстанда пикетлары һәм акцияләре белән дә билгеле була, диелә хәбәрдә.
