Зеленский Россиядәге Курск, Воронеж, Белгород, Ростов җирләренә кагылышлы указ имзалады

Украина президенты Владимир Зеленский Украина составына Россия Федерациясендәге «украиннар яшәгән тарихи территорияләр»не кайтару турында указ имзалады. Документта Курск, Воронеж, Белгород, Ростов һәм Брянск өлкәләре, шулай ук Кубань турында сүз бара.

Украина лидеры фикеренчә, документ «тарихның дөрес версиясен торгызырга тиеш». Зеленский Россияне украин милли үзенчәлеген юк итүгә юнәлдерелгән гамәлләр кылуда, шулай ук Украина гражданнарының хокукларын бозуда һәм ирекләрен чикләүдә гаепли.

РФ Иминлек советы рәисе урынбасары Дмитрий Медведев Владимир Зеленскийга украиннарның руслар булуын, ә Малороссиянең Россиянең бер өлеше булуын искәртте. Сәясәтче Украина президенты указында комментарий бирерлек бернәрсә дә булмавын әйтә.

«Болай ул тиздән Канаданы кушачак», – дигән Медведев.

Россия Президенты Владимир Путин элегрәк Украинаның беркайчан да Россия Империясенең өлеше булмавын, ә хәзерге дәүләт чикләре большевиклар карары белән барлыкка килүен искәрткән иде. Россия лидеры фикеренчә, Киевта СССР җитәкчелегенә дәүләтләре булганга рәхмәтле булырга тиешләр, коммунистик партия украиннарга Россиянең көньяк территорияләренең бер өлешен биргән.

Владимир Путин белдергәнчә, Украинаның үз идеологиясе, базасы, сәнәгате һәм акчасы юк, шуңа күрә илнең киләчәге дә була алмый. Бу хакта президент Россия Геройларына «Алтын йолдызлар» тапшыру тантанасыннан соң белдерде, дип яза «Комсомольская правда».