Үзең үлгәч багышлар өчен «Йәсин» яки тулы Коръән укытып кую рөхсәт ителәме?
Олыгайган саен, кеше ахирәт тормышы турында еш уйлана, үзенчә хәстәрлек эшләрен дә башлый. Хәтта үлгәнче үк үзенең рухына багышлап Коръән укытып куючылар да бар.
Татарстанның беренче баш казые Габделхак хәзрәт Саматов «Баш казый хөкемнәре» китабында әлеге мәсьәләгә түбәндәгечә якын килергә кушкан:
«Үзең исән вакытта гына изгелек эшли аласың бит. Үлгәч эшли алмыйсың. Шулай булгач, үзең исән чагыңда укы да укы. Укы да, укыттыр һәм ул югалыр дип һич шик тотма. Синең һәрбер эшең шул минутта гамәл дәфтәреңә язылып бара. Коръәннең „Зөлзиләт“ сүрәсендә болай дип әйтелгән: кем бер тузан кадәр генә изгелек кылса да, үзенә әйләнеп кайта, бер тузан кадәр явызлык кылса да, үзенә әйләнеп кайта. Ә инде укыганыңны үлгәч багышлар өчен саклап тора алмыйсың бит. Син үлгәч, дога кылырлык кешең калса, ул кылыр. Ул укып, үзенең укыганының савабын сиңа багышлап, Аллаһыдан ирештерүен сорап, дога кылыр. Аллаһының күрүче-ишетүче һәм һәрнәрсәне югалтмыйча гадел хөкем итүче икәнлегенә иманнарыбызны камил, нык тотарга тиешбез».