Зарядкадагы телефонны тотып утырган 14 яшьлек үсмер һәлак булган
Җылыту системасы батареясына сөялгәч, баланы ток суга.
8 февральдә Красноярск өлкәсенең Сосновоборск шәһәрендә 14 яшьлек үсмер ток сугудан һәлак була. Бу турыда РЕН ТВ хәбәр итте.
Үсмер диванда утыра, ул телефонын зарядкага тоташтыра һәм кулына тотып утыра. Бала үзе җылыту системасы батареясына сөялә. Шул мизгелдә аны ток суга, ул аңын югалта.
Әти-әнисе ашыгыч ярдәм чакыра, ләкин баланы коткара алмыйлар. Төбәк буенча Тикшерү комитеты хәбәр иткәнчә, тикшерү эшләре бара.
«Кеше бер яктан очраклы рәвештә генә көчәнеш астында булган ватык изоляциягә яки металл предметка орынганда, ә икенче яктан — җиргә, җылыту системасы торбаларына яки җиргә тоташкан башка предметларга орынган очракта куркыныч барлыкка килә», — дип искәртә белгечләр.
