Шундый заманалар җитте. Хәзер беркемгә бер сүз әйтеп булмый. Зарлана башласаң, транспорт йөртүче һәм кондукторлар:
– Гел әләкләп йөрсәгез, автобуссыз калырсыз. Җәяү атларсыз йә таксига утырырсыз!
Табиблар эшенә зарлансаң, алар:
– Күбрәк зарланыгыз. Табиблар да китеп барса, нишләрсез икән? Түләүлегә барырсыз!
Кибеттә:
– Гаеп табып йөрмәгез әле монда. Ите бозылган, сөте әчегән, имеш. Менә бөтенләй кибеткә ризык китерми башласалар, базарга барырсызмы? Югары бәядән, акцияләрсез алып карарсыз!
ЖЭУда:
– Сез әләкләүдән эшчеләр качып бетте. Сезгә һич ярап булмый: йә салкын өегездә, йә эссе. Карарбыз, кем эшләр икән сезгә шул барлы-юклы акчага?
Газ хезмәткәрләре:
– Сезгә ни җитми тагын?.. Зарланудан башка берни белмисез. Исегез киткән икән, техник хезмәт күрсәтү тиешенчә үтәлмәгән. Газ хезмәткәре килгәндер бит? Килгән! Бушка эшләп йөрибез бит инде.
Водоканалда:
– Һай, бу халыкның азынуы җитте. Исегез киткән икән, торбалардан су ага. Көтегез! Килмибез дип әйтмибез бит... Рәхәтләнегез яңа барлыкка килгән күл белән. Җәй, көннәр эссе. Барыгыз да диңгезләрдә ял итә алмыйсыз бит. Коеныгыз рәхәтләнеп. Керләрегезне дә шунда юыгыз!
Мондый мисалларны күп китереп булыр иде. Кызганыч, тиешенчә хезмәт күрсәтмәсәләр дә, барысы да үз бәясен күтәрергә тырыша.