Журналист, танылган алып баручы Зәмирә Рәҗәпова якын кешесе үтенече буенча «Яра» дигән җыр яздырган.
«Бу җырны, моннан берничә элек, Казанда «Нур» театры гастрольләре вакытында ишеттем. Аны «Туй алдыннан» спектаклендә җырладылар. Шунда күңелемә кереп калды. Һәм мин аны борын астыннан гына гел көйләп йөрдем.
Моннан берничә ел элек якын кешем ирен югалтты, шалтырата да, «Зәмирә, җырла әле теге җырны»,– ди. Кая инде, җырлау булмый, елашу гына. Аның үтенече буенча яздырырга булдым.
Бик каты хөкем итмәссез дип ышанам», – дип тәкъдим иткән ул.
«Зәмирә, искиткеч. Һәр сүзне җиткереп, күңелгә тиде, үзе гади дә кебек, моңлы да, тавышың матур. Күпкырлы талант иясе син», – дип язган Ләйсән Мәхмүтова.
«Ләйсән, рәхмәт. Минем өчен җырчылардан бәя ишетү бик мөһим», – дип җавап биргән Зәмирә Рәҗәпова.
Бу җыр күпләрнең күңеленә үтеп кергән, күңел кылларын тибрәткән, елаткан да:
«Зәмирә, нинди ихлас башкарасың бу җырны. Моң агыла»;
«Бик матур килеп чыккан. Булганнан бар да була»;
«Бигрәк матур җыр! Бигрәк матур итеп җырлыйсың. Елаттың, Әллә ничә тыңладым, үкси-үкси еладым», – кебек күпсанлы комментарийлар калдырганнар.