Закир Шаһбанның хатыны иренең мөстәкыйль рәвештә нәрсәләр эшли алуын сөйләде
Шагыйрә иренең мөстәкыйль рәвештә нәрсәләр эшли алуы турында язган.
Гөлүсә Шаһбанга тормыш иптәше турында сораулар күп киләдер, мөгаен. Ул иренең нәрсәләр эшли белүе турында Закир Шаһбанның инстаграмына пост куйган. «Компьютерны иркен куллана. Хатлар кабул итеп, җавап яза, аерым программалар ярдәмендә дөньяның теләсә кайсы почмагында яшәүче дуслары белән аралаша, җырлар эзли, тыңлый, программалар куя. Бик күп китаплар тыңлый. Якынча биш йөздән артык китап тыңлаган, алар арасында детектив, философия, психология, эзотерика һәм башка жанрдагы китаплар бар.
Хәзерге вакытта 11нче айфон белән иркен куллана, коммуналь хезмәтләрне түләү өчен карточкадагы акчалар белән иркен идәрә итә.
Ерак араларга йөрүче поездда берүзе йөри.
Өйдә югалган әйберне эзләп табучы - ул.
Мәктәп программасын әйбәт белә. Математика, рус телендәге бөтен кагыйдәләрне белә, грамматиканың бөтен кагыйдәләрен исендә тота.
Башында меңнән артык телефон номеры саклана», — дип яза ул.
«Искиткеч бит бу!», «Афәрин!», «Ничек шундый хәтергә ия булып була ул», — дип соклануларын белдергән инстачылар.