Зәй районында дүрт автомобиль катнашында авариядә 26 яшьлек кыз һәлак булган. Тагын ике кеше, шул исәптән җиде яшьлек бала, яраланган. Бу турыда «Татарстан 24» каналы хәбәр итте.
Авария 3 сентябрьдә Чаллы — Зәй — Әлмәт автомобиль юлының 42нче чакрымында булган. Якынча мәгълүматлар буенча, BMW йөртүчесе «Узып китү тыела» билгесе гамәлдә булган урында каршы як полосага чыккан.
Башта BMW йөк машинасы — КАМАЗ белән янәшә бәрелешкән, аннары йөк машинасы артыннан хәрәкәт иткән Toyota RAV4 һәм Toyota Land Cruiser автомобильләренә бәрелгән.
Юл-транспорт һәлакәте нәтиҗәсендә BMWның 26 яшьлек пассажиры урында ук үлә. Автомобиль йөртүчесе һәм аның җиде яшьлек пассажиры җәрәхәтләр алган, диелә хәбәрдә.