Үз-үзен дәвалап терелмәкче булган ир-атның гомерен табиблар коткарып калган

Сочида табиблар үз-үзен дәвалап соң чиккә җиткергән 33 яшьлек ир-атның гомерен саклап калганнар. Бу хакта Краснодар крае Сәламәтлек саклау министрлыгы хәбәр итә.

Ир-ат, бавырында көчле ялкынсыну белән, Сочиның дүртенче санлы хастаханәсенә китерелгән. Ир-ат бик каты кычынган, тән тиресе сап-сары булган. Белгечләр авыруның йогышлы булмавын ачыклаган. Баксаң, ир-ат, рекламага ышанып, интернеттан биологик актив матдәләр сатып алган булган. Препарат медикаментоз гепатит китереп чыгарган, нәтиҗәдә аның бавыры ялкынсынган.

Табиблар әйтүенчә, гепатит шулкадәрле тиз барлыкка килгән ки, тагын берничә сәгатьтән ир-ат, бавыры череп, үләргә мөмкин булган.

Пациентка гепатотроп һәм гормональ терапия билгеләгәннәр һәм ике атна хастаханәдә дәвалаганнар. Әмма аңа әле бик озак вакыт амбулатор шартларда дәваланырга туры киләчәк.

Комментарийлар (0)