Зәйдә кибеттә хатынына пычак кадаган ирне урманнан эзләп таптылар
Кичә элеккеге хатынына һөҗүм иткән кешене бүген тоткарладылар.
Зәй шәһәрендә урнашкан кибетләрнең берсендә элеккеге хатынына һөҗүм иткән ир-атны урманнан тапканнар. Бу турыда «Татар-информ» агентлыгына Татарстан буенча Эчке эшләр министрлыгында хәбәр иттеләр.
Җинаятьче ир-ат кибеттә касса янында торган хатынның аркасына кимендә ун тапкыр пычак белән кадый һәм чыгып кача. Ул машинага утырып китә. Шундук аны эзли башлыйлар. Берничә эзләү төркеме оештырыла, план-перехват игълан ителә.
Ир-атның машинасын шәһәр читендә табалар. Ул машинасын биек үлән арасына яшергән, ачкычларын ыргыткан, үзе урманга киткән. Эзләүчеләр урман полосасында бер кешене күреп ала. Аның артыннан бинокльдән карап торалар. Бу — җинаятьче булырга мөмкин дип фаразлап, полиция хезмәткәрләре әлеге участокны тикшерә. Анда хатынына һөҗүм итүдә шикләнелүче ир-атны табып алалар.
Шулай итеп җинаятьчене Зәйдән Әлмәт ягына таба 25 километр ераклыкта табалар. Хәзерге вакытта аны Зәй полициясенә алып киткәннәр, аннары тикшерүчеләргә тапшырачаклар.
Моңа кадәр «Татар-информ» хәбәр иткәнчә, бу кеше хатынның элеккеге ире. Хатын берникадәр вакыт алдарак ирен көчләүдә гаепләп, полициягә гариза язган булган.
