Зәйдә кибеттә элеккеге хатынына пычак белән ташланган ирне эзлиләр
Күзәтү камерасы төшереп алган видеода коточкыч кадрлар сурәтләнгән.
Зәй шәһәрендә урнашкан бер кибеттәге хатын-кызга бер ир-ат пычак белән ташлана. Ул хатынны яралый һәм чыгып кача. Шәһәрдә план-перехват игълан ителгән. Бу турыда «Татар-информ» агентлыгы хәбәр итте.
Күзәтү камерасы төшереп алган видеодагы коточкыч кадрларда кибет бинасына бер ир-ат килеп керү күренә. Ул касса янында басып торган хатынга ташлана һәм берничә тапкыр хатынның аркасына, иңбашына һәм ян-ягына пычак кадый.
Агентлыкка Татарстан буенча Эчке эшләр министрлыгында хәбәр иткәнчә, җинаятьче — 47 яшьлек ир-ат. Ул яраланган 44 яшьлек хатынның элеккеге ире. Ир белән хатын талашкан, шуннан соң ир хатыннан үч алырга карар кылган.
Зәйдәге барлык хокук саклау органы структуралары җинаятьчене эзли.
Имгәнгән хатын хастаханәдә ята.