Зөлфия Шакировадан синнабон рецепты
Ризыкны беренче булып җырчының ире Җәвит Шакиров татып карый.
Синнабон камыры өчен: 2 йомырка, ярты стакан, шикәр комы, ярты кап чүпрә, бал калагы очы белән тоз, 1 стакан җылы сөт, 100 грамм атланмай, 2 аш кашыгы үсемлек мае, ванилин, он.
Камырны йомшак итеп басарга, кабартырга. Аннары юка итеп шакмаклап җәяргә, атланмай белән майларга.
Эчлек өчен: 4 аш кашыгы шикәр комы, ярты кап корица. Аларны бергә салып болгатырга һәм камыр өстенә сибәргә.
Камырны рулет итеп төрергә, 4 см киңлегендә кисеп, майланган табага ара калдырып тезәргә. Янә ярты сәгать кабартып алырга.
180 градуска кадәр кызган духовкада кабарып, бергә кушылып пешә.
Крем өчен бер көн алдан 1 банка куертылган сөтне (сгущенка) банкасы белән суга салып, 2,5 сәгать кайнатырга. Аннары 4-5 аш кашыгы каймак салып болгатырга. Пешкән синнабоннар өстенә ягарга, өстенә вакланган әстерхан чикләвеге сибәргә.
Сүнгән духовкада 15 минут тотарга.
Чәйләрегез тәмле булсын!