Үз бакчаңда үскән алма уңышын озак итеп саклау серләре
Алманы үрелгән кәрҗиннәр, пластик яки агач тартмаларда сакларга була.
Өйдә алмаларны -1дән 1 градуска кадәр температура, 85-96 процент дымлылык булган урында сакларга кирәк. Савытта үтәли җил йөри торган булсын. Үрелгән кәрҗиннәр, пластик яки агач тартмалар алырга була, тик аларның стеналарында ярыклар булу хәерле. Алма тутырыр алдыннан савытны дезинфекцияләгез. Бу турыда киңәшләр сайтында язылган.
Бөтен һәм коры алмаларны тартмага койрыгы белән аска каратып тезегез. Шундый ике-өч катлам ясагыз. Өске рәтнең койрыклары астагы рәттәге алмалар арасына туры килсен.
Алма шәлперәймәсен өчен өстенә торф, пычкы чүбе, ком, карабодай кабыгы сибәргә була.
Алманы пластик пакетта саклап була. Бер пакетка кило ярым — ике кило алма салыгыз. Пакетны ике-өч көн ачык тотыгыз, артык дым чыгып бетсен. Аннары пакеттан һаваны мөмкин кадәр чыгарып бетереп, капрон бау белән бәйләп куегыз.
Алманы суыткычның яшелчәләр саклый торган тартмасында саклап була. Ләкин янына башка яшелчә куймагыз. Биредә алманы озак тотып булмый. Язга кадәр саклау өчен, туңдырырга туры килер.