«Юылмаган сантиметр калмады»: Ләйлә Галиева президентка шалтыраткан
Башкортстан җырчысы ризык тулы өстәл артына утырып, колагына груша куеп фотога төшкән.
Башкортстан җырчысы Ләйлә Галиева грушаны телефон итеп, президентка шалтыратуы турында язган.
«Алё! Бу үзизоляция озакка барыр микән? Нинди тишек-пошык бар, җыештырып бетердек. Авылдагы җәйге, көзге, кышкы эшләргә кадәр эшләп бетерәбез бит инде, пешермәгән ризык калмады бит… "Нишләргә тагын?" - дип президентка шалтыратып утырам. Ә сездә карантин ничек үтеп бара?» - дип язган җырчы.
«Ләйлә, симерә күрмә әле. Аш-суга оста икәнеңне аңладык. Тукта!», «Май азагында нәрсә аша сөйләшербез икән», - дип куркуга төшкән кайбер инстачылар.
«Россия президентына шалтыратасыздыр?» - дип кызыксынган икенчесе.
Җырчының виртуаль дуслары да үз хәлләрен язган. Кайберәүләр гел эштә икән, башкаларның карантинына кызыгуларын, эшләрен эшләргә берәр атна карантин теләүләрен язган.
«Авылда эш бетә торган түгел, сезгә эш табылыр. Менә безгә фатирда ни эшләргә икән, бер тишек тә калмады җыештырмаган»;
«Кайтып, рәхәтләнеп ятыр урыныгыз булгач, кадерен белеп, пешеренеп тик ятыгыз. Сез әниегез янында, бернинди коронавирус та тимәс. Гөрләшеп ятыгыз»;
«Җыештыру беләнмени, артыннан ук тузып бетә. Өй тулы кеше»;
«Бездә дә эш бетте. Нәрсә эшләргә белмим»;
«Биш вакыт намаз укысаң, көн бик тиз уза»;
«Юылмаган сантиметр калмады»;
«Безнеке башланмаган әле. Ике бала өйдә укый, ирем өйдә укыта, кечкенәсенә күз-колак булырга кирәк. Тавышланмасын өчен аның көен көйләргә кирәк. Укулары беткәнче, эшләмичә дә арып бетәм»;
«Аллага шөкер, Ленинград блокадасы түгел бит… Авылда ашыйбыз да, эшлибез дә»;
«Сезнең эшегез беткән, ә безнеке башланмады да бит әле».