21 июньдә Ютазы районында Эстәрле – Каразирек – Урыссу юлында авариядә машина йөртүче үлә. Бу турыда Дәүләт автоинспекциясенә сылтама белән «Татарстан 24» каналы хәбәр итте.
Якынча белешмә буенча, «Renault» машинасы белән идарә итүче 1982 елда туган ир-ат исерек була. Ул зур тизлектә барганда идарәсен югалта, һәм машина юл кырыена төшеп каплана.
Ир-ат иминлек каешын арттан гына бәйләп куя, үзен эләктерми. Шул сәбәпле авария вакытында йөртүче тәрәзәдән очып чыга. Ир-ат фаҗига урынында һәлак була.