Ютәлне баса торган дарулар белән генә дәваланган 14 яшьлек кыз пневмониядән үлгән
![Ютәлне баса торган дарулар белән генә дәваланган 14 яшьлек кыз пневмониядән үлгән](https://intertat.tatar/resize/shd/images/uploads/news/2023/12/26/62f52e0760b75a12803809fdf60f1ae3.jpg)
Әлмәттә 14 яшьлек кыз пневмониядән вафат булган. Аны температура төшерә торган, юткерүне баса торган дарулар белән генә дәвалаганнар. Бу хакта «Mash Iptash» Телеграм-каналы яза.
Кызның 2 көн буе температурасы 38дән төшми. Әнисе парацетамол һәм шуңа охшаш дарулар белән температурасын төшерергә тырыша, тик файдасы булмый. Өченче көнгә иртән ул кызын хастаханәгә алып китә. Бала төш вакытында вафат була. Кызны ярып караучылар анда ике яклы пневмония чире булуын ачыклый.
Әлеге факт буенча җинаять эше ачылган. Гаепле кешегә 2 ел колония яный. Кыз мөмкинлекләре чикләнгән балаларны укыта торган 19нчы мәктәптә белем алган, анда Даун синдромы булган. Кызның әнисенә 52 яшь, ул күптән түгел пенсиягә чыккан.
Татарстан Сәламәтлек саклау министрлыгының матбугат хезмәтендә белдерүләренчә, бу хәл – баланың туганнары һәм якыннары өчен зур фаҗига.
«Татарстан Сәламәтлек саклау министрлыгы исеменнән кайгы уртаклашабыз. Кызганычка каршы, беренчел мәгълүматлар буенча, вакытында медицина ярдәме сорап мөрәҗәгать итмәгәннәр. Мондый очракларның һәрберсе һәрвакыт экспертларны җәлеп итеп хәл ителә, тикшерү үткәрелә», – диделәр ведомствода.