Юл һәлакәтендә бер гаиләдән өч кешенең гомере өзелде
Башкортстанның Чакмагыш районында Бүздәк – Чакмагыш – Дүртөйле автомобиль юлының 64 нче километрында булган авариядә бер гаиләдән өч кеше үлгән.
Башкортстан Республикасы Дәүләт автоинспекциясе матбугат хезмәте мәгълүматыннан күренгәнчә, ВАЗ-2107 машинасы белән идарә иткән 45 яшьлек ханым тиешле урында BMW-525 йөртүчесенә юл бирмәгән дип фаразлана. Бу хакта "Башинформ" хәбәр итә.
Хатын-кыз һәм аның 24 яшьлек улы һәлакәт урынында ук үлгән. Арткы утыргычта булган 17 яшьлек улы җирле хастаханәнең реанимация бүлегенә озатылган. Тик табиблар аны коткарып кала алмый: ике сәгатьтән аның йөрәге тибүдән туктый.
Ведомство мәгълүматы буенча, вафат булган ханымның 4 ел элек автоһәлакәттә ире үлгән. Тулы бер гаиләнең гомере авариядә өзелгән дигән сүз.
Иномарка руле артында булган 48 яшьлек кеше һәм аның 24 һәм 37 яшьлек пассажирлары төрле дәрәҗәдәге тән җәрәхәтләре алган.
