Юл кырыеннан ат җитәкләп барган кызны таптаткан машина йөртүче йөрәк өянәгеннән үлгән
Ат сискәнеп, арт аякларына баскан һәм кызны машина астына тибеп керткән.
28 апрельдә Мурманск өлкәсендәге Апатиты шәһәрендә юл кырыеннан 17 яшьлек кыз ат җитәкләп бара. Шул чакта бу кызны Geely машинасы бәрдерә. Бу турыда Север.Пост сайты язды.
Юл һәлакәте ипи пешерә торган завод тирәсендә була. Ат узып баручы машиналардан сискәнә һәм арт аякларына баса. Шул чакта ат кызны Geely машинасы каршына тибеп чыгара. Машина йөртүче тормозга басарга өлгерә. Машина белән 1972 елда туган ир-ат идарә итә.
Имгәнгән кызны хастаханәгә озаталар. Аның хәле бик авыр дип бәяләнә. Кызны санавиация ярдәмендә Мурманск шәһәренә җибәрергә җыеналар.
Авария урынында машина йөртүчегә дә табиблар ярдәме кирәк була, аның йөрәге авырта. Тикшерү күрсәткәнчә, ир-ат авария вакытында аек була.
Шул ук көнне кичке якта ир-атның кабат хәле китә, аны хастаханәгә озаталар. Кичке сигез тирәсендә ул үлә. Якынча белешмә буенча, ир-атка инфаркт булган.
Ир-ат ЮХИДИ хезмәткәрләренә сөйләгәнчә, ул юл кырыеннан бара торган атның арт аякларына баса башлавын күреп ала, тормозга баса. Шулай да машинасын бөтенләй туктатып бетерә алмый, диелә хәбәрдә.
«Хибинформбюро» хәбәр иткәнчә, кыз атны йөгәненнән тотып җитәкләп барган. Авариядән соң ат качып киткән. Шаһитлар сүзләренчә, аннары ат үзе атлар клубына әйләнеп кайткан.