«Юктан чыга бит ызгыш»: Рәфинә Ганиуллина бәрәңге аркасында ире белән талашкан?
Татар эстрадасының парлы җырчысы Рәфинә Ганиуллина белән Рәзил Камалов кыздырган бәрәңге аркасында сүзгә килгән булганнар. Әмма хәзер «бәрәңге кыздырганым юк, талашкан да юк», — ди Инстаграм битендә Рәфинә Ганиуллина.
«Өч ел элек миңа Рәзил 8 март бәйрәменә таба бүләк иткән иде. Ну ачуым чыккан иде ул вакытта, ләкин тора-бара бу таба минем якын дустыма әйләнде.
Беркөнне шул табада гөмбә белән бәрәңге кыздырдым.
Иң элек кызган майлы табага суган белән гөмбә турап салдым, аннары озынча итеп туралган бәрәңге җиппәрдем. Тозлап, су өстәп, капкач белән томалап куйдым. Шуннан, пешеп җитәрәк өстенә шакмаклап атланмай куеп чыктым да тагын бераз томалап тордым! Аның өйгә таралган хуш исләре-е-е-е! Рәзил табасы белән бөкләп тә куйды. Берзаман эче авырта башлады аның. Шуннан рәхәтләнеп талаша башладык!
Сездә дә шулайдыр инде ул?
Юктан чыга бит ызгыш!
— Ник күп ашадың соң дим?
— Тәмле итеп пешермәскә идең, үзең гаепле, ди!
Минем тәмам ачуым чыкты!!!
— Ярар инде, үпкәләтәсем килмәгән иде, борын яфракларыңның кабарганын гына күрәсем килгән иде, - ди.
Минем, дөрестән дә, ачуланганда борын яфракларым кабарып, күбәләк канатлары шикелле җилпенә башлый.
Шуннан?
Шуннан бирле бүтән бәрәңге кыздырганым юк әле!
Ни гаҗәп — талашкан да юк!
Гел әрләшми торсаң да күңелгә нәрсәдер җитмәгән кебек була икән ул.
Əй, ярар, иртәгә тәмле итеп бәрәңге кыздырам әле!!!» — дигән Рәфинә Ганиуллина.
«Рәфинә, көлдем инде рәхәтләнеп, чынлап та бик дөрес язгансың, һәркемдә шул ук хәлдер ул», «Күгәрченнәр кебек берегез бер тәрәзәдән, икенчегез икенче тәрәзәдән очып, гөр-гөр килеп гөрләшеп яшәгез… Гомер бик тиз уза…», «Бик матур пар, бәхетле булыгыз», — дип яза халык.