Җырчы, юмор һәм пародияләр остасы, биюче дип тә өстисе килә, Данир Сабиров тамашачысы игътибарына яңа җырын тәкъдим итте.
«Кадерле тамашачым! Сезне күптән яңа җырларым белән сөендергәнем булмады. Һәм ниһаять! «Пар алма» җырыбыз әле генә «табадан төште», һәм сез аны рәхим итеп тыңлый аласыз! Барлык музыкаль мәйданнарда! Рамил Әсхәдуллин көе, Альбина Мортазина сүзләре.
Ә комментрийларда үзегезнең парыгызны билгели аласыз, парыгыз кем? Без дә белик әле», – дип язган Данир социаль челтәрдәге сәхифәсендә.
«Бик матур җыр, радиодан тыңлап өлгердем», «Машинда тыңларга менә дигән», «Данир, маладис. Һәрвакыт хәрәкәттә ул...» – дип бәяләгәннәр артистның язылучылары.
«Тавышыңның компьютер аркылы чыкканы бик нык сизелә. Үзеңнең чын тавышың матуррак», – дип, дәгъва белдерүче дә булган.
«Энем, җырлама, дип күпме әйтергә була! Юмор синеке!» – дигән берәү.
Ә аңа җавап итеп, башкалар күпкырлы талант иясен яклап чыкканнар: «Җырла, Данир! Беркемнән дә ким түгел, бик матур җырлый. Җырласын да, биесен дә, көлдерсен дә!», «Безнең гаиләгә, мәсәлән, Данир бар яклап та ошый. Тамашачыларыңны сөендерүне дәвам ит, Данир!» – дип язганнар алар.