Җырчы Миләүшә Сафина социаль челтәрдәге сәхифәсендә гаиләләре белән күченеп китәргә җыенулары турында язып, халыкны аптырашта калдырган.
«Дуслар, Казан, хуш!
Привет, Австрия! Ниһаять, барлык кәгазьләр әзер! Каршылыклар булмасын өчен, барысы да сер итеп эшләнде. Инсбрук, без очабыз. Хәзер йортны һәм илне калдырырга туры киләчәк. Яңа планнар һәм офыклар вакыты. Дуслар, безнең күрешергә, туганнарны һәм якыннарны кочакларга, «киләсе очрашуларга кадәр» дияргә нәкъ 1 атнабыз калды.
Сез мәңгегә йөрәгемдә булырсыз һәм сезне елмаеп искә алырмын. Хәзер мин яңа үрләр яулаячакмын. Кайчан кайтачагыбызны белмим, әмма кунакка кайтабыз.
Бу хәбәрне ниндидер Вася язган. Мин аны белмим, әмма миңа шундый ошады һәм сезнең белән уртаклашырга булдым. Василий, уңышлар сиңа», – дип язган җырчы.
Җырчының дуслары, танышлары, якыннары аптырашта калган, ә ахырына кадәр укучылар рәхәтләнеп көлгән.
«Һәр җөмләсен укыган саен, «вәт юләр, вәт юләр» дип әйттем. Ярый дөрес түгел әле», «Куркып киттем», «И Аллам, китәсез дип торам», «Шул тамаша куркытмыйлар инде», – дип язганнар.
«Кая китсен инде мишәр өчпочмаклардан башка» дип ире турында язучыга «мишәр беркайда да югалмый» дип җавап биргән җырчы. Комментарий язучы килешмичә булдыра алмаган.
Чын дөресе шул - җырчы ире һәм 3 баласы белән яши торган Көек бистәсеннән беркая да китәргә җыенмый.