Җырчы Илзидә Госманова мошенниклар корбаны була язган. Алай да алданмаган, тапкыр җаваплар биреп, котылып калган.
«Таныш булмаган номердан бер ир шалтырата. «Мин полициядән Игорь Әлләкемович, мошенниклык факты буенча», – ди. Кыскасы, минем исемгә кредит алырга маташканнар икән. Кемгә соңгы тапкыр паспорт мәгълүматларымны биргәнмен, ничә картам бар, аларда күпме акчам бар икәнлеген сораша бу. «Мин рульдә барам, хәзер 900гә шалтыратып, картаны «заблокирую», – дим. «Сез алай итеп мошенникларны куркытасыз, тикшерү процессына комачау итәчәксез», – дигәч, бу кешенең үзенең мошенник икәнлеген аңладым.
«Минем ике ипотека, бер кредит, тик һаман җитеп бетми, тагын азрак биреп тормассызмы икән?» – дигәч, ык-мык итте дә трубканы куйды.
Соңгы вакытта андый кешеләр күбәйде, алданмагыз! Бурычка яки болай гына акча сораучы танышлар, белмәгән кешеләр дә шактый. Ир кешеләр бит әле алар – шунысы тагын да гаҗәпләндерә. Нинди заман китте, дип уйлап куясың. Монысы инде – башка тема», – дип язган җырчы социаль челтәрләрдә.
