Сәхнәдә Асылъяр тәхәллүсе белән чыгыш ясаучы җырчы Алсу Зәйнетдинова халыкка «Яланаяклы кыз» сериалында төп рольне уйнаучы буларак та билгеле. Җырчы гаиләсен социаль челтәрләрдә күрсәтү яклы түгел. Башка эстрада артистларыннан аермалы буларак, ул балаларының фотоларын да, һөнәрләрен күрсәткән видеолар да куймый.
Бу юлы җырчы искәрмә ясаган, сабыеның туган көне уңаеннан, кызы белән төшкән фотосын куйган.
«Кояшым минем, кызым! Багалмам! Туган көнең белән котлыйбыз сине! Озын гомерле, сау-сәламәт бул, балам! Миһербанлы-шәфкатьле, олы йөрәкле, кешлекле, тырыш, гыйлем-мәгърифәтле булып яшәргә насыйп итсен Ходай! Әтиең белән миңа, абыеңа, туганнарыңа игелекле бул, балам. Без сине бик яратабыз», – дип язган җырчы.
Җырчының виртуаль дуслары да нәни кызчыкны туган көне белән котлаган һәм изге теләкләрен язып калдырган.
