Җырчы Зөлфирә Шәйдуллина виноград куакларын кышка каплап куярга өйрәтә
Виноградның төбенә көл сибеп, туфрагын бераз көпшәләндереп тә куйсагыз бөтенләй шәп була инде, киңәш бирә Зөлфирә.
Җырчы Зөлфирә Шәйдуллина виноград ботакларын кышка чыршы ылыслары белән каплап куярга өйрәтә.
«Виноградны кышка ничек итеп каплыйсыз дип, бик күпләрегез сораган иде. Чыршы ботакларын кисеп, шуның белән каплыйбыз, җылытабыз», — дип сөйли җырчы.
Ылыс белән каплау тычканнардан, салкыннан, черектән саклый. Виноградка бик зыян китермичә генә, астан, өстән әйбәтләп капларга кирәк, дип аңлата ул.
«Көзге салкыннар башлангач капларга кирәк. Бездә кашма дип атала инде, капчык тышлыгы белән каплап куябыз да, өстенә бераз ыргытабыз яки такта белән каплап куябыз. Виноградның төбенә көл сибеп, туфрагын бераз көпшәләндереп тә куйсагыз бөтенләй шәп була инде. Бу виноградка иң яхшы ашлама!» — киңәш бирә Зөлфирә.
Аның бу киңәшләре инстадусларына да бик файдалы булган, күрәсең. Рәхмәт әйтеп, җырчыны мактап язучылар байтак.
«Яшь кенә булсаң да, бөтен эшнең рәтен беләсең!», «Зөлфирә, рәхмәт бик матур итеп күрсәтеп аңлаттың», «Миңа да бик кирәк иде бу язмаң, бүген генә уйлаган идем, ылыс белән төрсәң ярыймы икән диеп, ә син эшләп кенә тугел, аңлатып та бирдең», «Супер, молодец та икән соң үзең, ходай барысы белән бүләкләгән бит. Матур тавышка ия булуың ни тора, һәвәскәр бакчачы да икәнсең», «Җырчы гына түгел, менә дигән бакчачы да икән син!», дигән комментарийлар язып калдырганнар.