Җырчы Вәли Фазлыйәхмәтов мәхәббәте хакына яулык бәйләгән
Җырчы Вәли Фазлыйәхмәтовның тормыш иптәше Гөлназ Гафурова ире өстендә экспериментлар үткәрә.
Гөлназ Вәлигә яулык бәйләү процессын видеога төшергән. «И, дусларым, сабырлык безнең ирләребезгә. Безнең өчен терәк тә, дус та була алгач, ярдәмнәрен сизеп яшәгәч рәхәт инде, сүз дә юк! Менә шулай сезнең өчен мастер-класска әзерләнәбез. Үзеңә яулык бәйләгәндә бик җиңел һәм тиз, ә менә зур аудитория алдына чыкканда репетиция кирәк. Баштан өйдәгеләр белән, аннары сезнең белән. Улым качты, ә ирем каршы килә алмады», — дип язган Гөлназ Гафурова. Видеода яулык бәйләгән Вәли үзен әби белән чагыштыра, «Вәлигә барам әле», — дип җырлап та җибәрә.
Күпләр әлеге гаиләгә булган хөрмәт һәм соклану хисләрен җиткергәннәр, Вәлинең сабырлыгына гаҗәпләнеп мактау сүзләре язганнар.
«Афәрин, Гөлназ! Минеке модель булырга беркайчан да ризалашмас иде. Афәрин, Вәли», — дип язган җырчы Гөлнара Габидуллина.
«Бу манекен кайда сатыла?» — дип кызыксынган бер ханым.
«Минем өчен генә», — дип җавап кайтарган Гөлназ Гафурова.
«Мәхәббәт нишләтә егетләрне — яулык бәйләргә дә риза!», «Позитив өләшүегез өчен рәхмәт!» — дип комментарий калдырганнар җырлы гаиләнең виртуаль дуслары.