Җырчы Слава: "Хәйриячелек - иң котычкыч әйбер"

"Одиночество - скука" дигән хиты белән танылган җырчы Слава инстаграмына видео-мөрәҗәгать куйган. Әйтергә кирәк, Славаның кыяфәте бик сәер - бизәнмәгән, чәчләре таралмаган, үзе халаттан. Башта ул авырый дигән фикер кала, әмма Слава үзенең бу халәтен йоклый алмавы белән аңлата. "Хәтта йоклый алмыйм" дип, ул мөрәҗәгатен башлый.

Слава хәйриячелеккә, каты авырулы балаларга акча җыеп бирергә өндәгән телевизион роликларны кискен тәнкыйтьли. Слава үзенең озак дәшмәвен, әмма түземсезлекнең соңгы чиккә җитүен әйтә. 

"Байлыкларының чиге юк, ә ниндидер конкурслар оештыралар. Сезгә оят түгелме? Ярдәм итәсегез килә икән, шыпырт кына ярдәм итегез! Сез бик бай! Мондый хәйриячелек - дөньядагы иң котычкыч әйбер. Бу хәйриячелек түгел, бу "тварительность" (хәшәрәт сүзеннән ясалган сүз - ред.)" - дип сөйли Слава.

Славаның сүзләре белән күпләр риза түгел. Славаның видеосы астында инстадашлары җырчының начар кыяфәттә булуына басым ясап, мөгаен, ул кичтән яхшы гына "бәйрәм иткәндер" дип фараз итәләр.