Җырчы Әсхәт Дөбер – Шатр: «Авыр ел булды, күп дәресләр бирде»
Җырчы, тренер Әсхәт Дөбер-Шатр фәлсәфи пост чыгарган.
«Тагын бер ел гомерем узып китте. Сез ничектер, ә мин моңа баладай куанам. Быел да туган көнемне исән-сау, гаиләм янәшәсендә каршы алам. Мин яшим! Мин яратам!
Авыр ел булды… Әмма ул бик күп дәресләр бирде, яңача яшәргә, башкача уйларга өйрәтте. Тагын да зирәкләндем, сабыр итәргә, юктан гына да бәхетле мизгелләр күреп, шатланырга өйрәндем.
Читтән караганда гомер уртасына җиткән ир-атны башка берни гаҗәпләндермәс, бөтен нәрсә өйрәнелеп-тикшерелеп беткән кебектер. Юк шул, ялгышасыз… Өйрәнүдән, гаҗәпләнүдән туктап булмый, чөнки дөнья зур, киң ул, гаҗәп серле ул.
Тирә-якта гармония булсын. Яшь барган саен, тормышта иң мөһиме — гармония булганын аңлыйсың, шуңа омтыласың. Янәшәңдә яраткан хатының, балаларың, үзеңне шәхес буларак реализацияләгән эшең, җанга якын шөгылең бар икән, бәхет өчен тагын нәрсә кирәк?! Башка берни дә кирәкми. Ышаныгыз!
Туган көнем белән мине!
Артык фәлсәфи пост булды әле бу. Фәлсәфи булырга да хакым бардыр инде», — дип язган ул.
Җырчының инстадуслары туган көн котлауларын җиткергәннәр.