Җырчы Резидә Кадыйрованың ире күршесеннән ничек үч алган?
Элекке полиция хезмәткәре машинасын дөрес урынга куймаган күршесен үзенчә акылга утырмакчы булган.
Татарстанның атказанган артисты Резидә Кадыйрованың ире «үз урынына» машинасын куйган күршесеннән үч алган — тәгәрмәчләрен тишкән. Бу хакта «Мэш Иптәш» телеграм каналы яза.
Данис Борһанов — элекке полиция полковнигы. Ул тормыш иптәше белән Карбышев урамындагы бер йортта гомер кичерә. 31 гыйнвар көнне Борһанов чүп түгәргә чыккан җирдән күршесенең машинасын дөрес урынга куймаганлыгын абайлап ала. Элекке вакытта ничек «гадел хөкем» чыгарганнарын искә төшереп, Борһанов күршесен акылга утыртырга ниятли.
Аның сүзләренчә, парковка урыннары торак милекчеләре ширкәтенә карый (димәк бу урыннарга машиналарын алар гына куя ала).
Зыян күрүче, Борһановның полициядә элемтәләре булганны аңлап, гариза язып мәшәкатьләнмәгән, диелә хәбәрдә.