Җырчы һәм тамада Айгөл Зиянгирова үзенә начар сүз язучыларга куана: «Шатлык!»
Танылып килгән йолдызның аккаунтында Марат исемле хейтер барлыкка килгән.
Җырчы һәм тамада Айгөл Зиянгирова Инстаграмда хейтеры барлыкка килүенә куанып яза. Хейтер — «күралмау» дигәнне аңлата, шулай дип кешегә гел начар сүзләр язып торучыларны атыйлар. Популяр җырчылар өчен бу бик таныш күренеш — аларның һәрберсенең диярлек шундый хейтерлары бар.
Күрәсең, танылып килгән җырчы дуэт — Эльмир һәм Айгөл Зиянгировларны шулай «яратучы» моңарчы булмаган.
«Шатлык.
Хейтерлары булмаган аккаунт-битләр бик кызык түгел, дигән сүзне ишеткәнем бар иде минем. Шуннан уземнекен карыйм: гел матур мактау сүзләре язалар, уңган, тырыш сез, дилэр, рәхмәт яугырлары. Ник бер начар сүз булсын, хәтта, кем әйтмешли, бәлки кызык та түгелдер.
Бүген шушы статистиканы бозып, бер Марат исемле хейтер көне буе миңа, минем подписчикларыма һөҗүм итте. Инде башта нормаль кеше буларак, үземчә, аңлатып язырга тырыштым. Ни дисәң дә, беренче хейтерым бит, игътибар бирдем. Шуннан, «тиле, тиле дигән саен тигәнәк буе сикерә» дип, теге мине өйрәтә башлады.
Рамазан ае, ураза бит дип, матур гына смайликлар куйгаладым. Мин бала имезгәнче, әллә ниләр язып тутырган теге. Контент уйлап чыгар ди, тагын әллә ниләр. Мин — 3 бала әнисе, авылда үзизоляциядә ятам. Нидер уйлау түгел, кайвакыт утырып ашарга да вакытым юк. Постларны да, күбесенчә, төнлә язам.
Шуннан бик яхшы зирәк кеше Лилия Кадыйрованың сүзләре искә төште: «Капка астыннан өреп яткан һәр эткә игътибар итәсе юк икән».
Спорт белән мин һәрдаим шөгыльләнәм, под копирку түгел, сәламәтлек өчен, үземне яхшы хис итәр өчен. Яхшы гадәтне кабатласаң да начар түгел. Минем тренерым Эльмир Җиһангиров. Чынлап әйтәм, кияүгә чыкканнан бирле, без бергә шөгыльләнәбез. Фигура геннан килми шул. Житмәсә, модадан артта калганмын булып чыкты. Кыскасы, «без вины виноватая». Нәтижә, страницам кызык булмаса булмас, миңа хейтерлар жибәрмә, Аллакаем. Бүгенгесе дә житкән. Тем более, атказанган блогер булырга планлаштырмыйм… әлегә. Марат хейтерымны блокка куймадым, минем видеоларны карап, эче пошып, нервланып ятсын әле.
Язды, язды да, видео астындагы комментарийларны бетереп ташлады. Купме вакытын әрәм итте егет», — дип язган ул.
«Шәп язгансыз. Андый кешеләргә игътибар итмәгез».
«Бернәрсә булдыра алмаган юньсез кеше шулай яза ул. Андый мескеннәргә игътибар итмәгез», — дип язган укучылары.