Җырчы Иркә нәрсәдән ояла?
Иркә кызы Әминәнең май язган видеосын куйган һәм әнисе турында пост язган.
Җырчы Иркә кызлары белән авылга әнисе янына кайткан. Кызларын эшкә өйрәтеп үстерүен күрсәтеп, видео да куйган.
Видеода кызының май язып утырганы күренә. «Бөтен балачагым шулай май язып узды. Ныграк басып яз, кызым», — ди ул.
Видео янына әнисенең эш кушарга яратуын, әнисенә булган мәхәббәте турында язган җырчы.
«Иртән уянгач та, әллә ничек оялып куясың, чөнки әнием урынында юк. Абзар ягыннан әнинең җырлый-җырлый тавыклар ашатып йөргәне ишетелә… Әни күптән торган, безнең күзгә күренми торган эшләрне күптән эшләп куйган.
Хәзер тавыкларны ашаткан буш табагын тотып, әни керәчәк. «Тордыңмы?» - дигән сорауга җавап көтмичә, миңа әзерләгән эшләрен тезеп китәчәк. Ул минем газиз әнием. Аның һәр хәрәкәтен, әйткән сүзләрен яратам, кадерле ул миңа.
Эшне кушарга ярата, әгәр вакытында эшләмәсәң, үзе эшләп куя торган гадәте дә бар. Шул вакытта бик оят була, шуңа күрә эшне кушуга эшләргә өйрәнгән.
Әнә кызларымны да эшләргә өйрәтә. Ипигә май ягып ашарга яратасыз, каян килеп чыкканын да белегез, ди. Кызларым вак-төяк өй эшләрен җиренә җиткереп эшләп куя инде», - дип тәмләп пост язган Иркә.
Инстачылар балаларның эшкә өйрәнеп үсүен хуплаган.
«Безнең әни дә, әби дә шулай эшкә өйрәтеп үстерде, мин үземнекеләрне тыңлата алмыйм», - дип зарын белдергән бер ханым.
Җырчының виртуаль дуслары балачакта май язуларын искә төшергән. Кемдер өч литрлы банкага салып болгап йөргән, икенчесе каймакны гөбегә салып сәгатьләр буе туглаган, өченчеләр миксер белән генә яза икән.