Йорт подвалында өч ир агуланып үлгән
Башкортстанның Кушнаренко районындагы "Весна" бакча ширкәтендәге бер йортның подвалында өч ир мәете табылган.
Бу хакта Башкортстан буенча гадәттән тыш хәлләр һәм гражданнар оборонасы министрлыгына сылтама белән "Башинформ"га хәбәр итә. Бөре шәһәрендәге диспетчерлык пунктына 23 сентябрь кич Кушнаренко районының "Весна" бакча ширкәтендәге бер йортның подвалында өч ир мәете табылу турында хәбәр итәләр.
Тикшерү комитеты бу уңайдан экспертиза үткәрәчәк.
Министрлык подвалда ремонт эшләрен ялгыз гына уздырмаска киңәш итә. Берничә кеше эшләгән очракта, кемдер җилләтелә торган урында торырга һәм подвалдагыларга күз-колак булып торырга тиеш. Подвалларда кимерүчеләргә каршы кулланылган агуларның, яки нәрсәләрнедер яндырганнан калган газлар җыелырга мөмкин.