Җылы якка китәргә өлгермәгән пар аккошлар күл өстендәге бозга бәрелеп һәлак булган
Күл өстендә боз калынлыгын сигез сантиметр чамасы булган
Башкортстанның Сибай шәһәрендә яшәүчеләр ике аккош мәетен тапкан. Кошлар күл өстендә каткан бозга бәрелеп, һәлак булган. Бу турыда «Башкортстан» телеканалы хәбәр итте.
Биредә яшәүчеләр сүзләренчә, кошлар һавадан очып килеп, боз өстенә туры төшкән булуы ихтимал. Бәлки алар боз катканын аңламагандыр. 20 ноябрь иртәсендә Сибайда боз калынлыгын сигез сантиметр чамасы булган. Кошлар бәрелгәч, боз катламы ярылган эзләр барлыкка килгән.
«Алар көньякка китәргә соңга калган. Очып әйләнеп йөргәннәр дә, бер-бер артлы таш булып атылып күл өстендәге бозга бәрелгәннәр», — дип сөйли видео авторы.
«Аккошларның берсе үлсә, икенчесе дә үлә. Җылы якка очкан вакытта аккошларның берсе һәлак булса, шушындый хәл килеп чыгарга мөмкин», дигән риваять тә бар.