«Җылы итеп киендергән». Әни кеше дүрт баласын янгыннан коткарган, үзе һәлак булган

Обь шәһәрендәге ике фатирлы йортта янгында 42 яшьлек хатын һәлак булган. Бу турыда коткаручыларга сылтама белән «Вести» каналы хәбәр итте.

Фаҗига 16 февральдә кич белән була. Күп балалы гаилә яши торган фатирда янгын чыга. Ут чыгуны махсус җайланма тавышын ишетеп беләләр. Фатир хуҗалары да, күршеләр дә өйдән чыга, шаһитлар коткаручыларга хәбәр итә.

Янгын сүндерүчеләр килеп җиткәнчә, әни кеше, аның 17 яшьлек улы өйдән өч нәни баланы алып чыга. 11 яшьлек малай, 8 яшьлек кыз һәм 4 яшьлек кыз янгыннан котыла. Әни кеше аларга җылы киемнәр дә кидерергә өлгерә.

Коткаручылар утны сүндереп бетергәч, әни кешене идәндә яткан килеш табып алалар. Аны табибларга тапшыралар, кызганычка каршы ул вафат була, диелә хәбәрдә.