Җылы өендә утырган Сарман хатынын өч МЧС подразделениесе төн буе урманнан эзләгән
Төнге өченче яртыда Җәлилдә яшәгән гаиләнең уртак танышлары - бу хатынның иренә куркыныч хәбәр җиткерә. Хатын үзенең иптәш кызына урманга китеп, үз-үзенә кул салачагы турында әйткән була. Ир бу хакта 112 хезмәтенә шалтыратып әйтә.
Урманга киткән хатынны эзләр өчен Гадәттән тыш хәлләр һәм гражданнар оборонасы министрлыгының җирле бүлегендә ашыгыч рәвештә төркем әзерләнә. Коткаручыларның өч подразделениесе, шулай ук полицейскийлар хатынны җиде сәгать буе урманда эзли.
Эзләү 9.10 сәгатькә кадәр дәвам итә. Җиде сәгатьтән соң хатын табыла - ул беркая да китмәгән, җылы өенә бикләнеп утырган булып чыга.
