Җәйге яшен вакытында кая качарга?

Кешегә яшен сугу бик куркыныч күренеш, ул шунда ук үләргә мөмкин. Фаҗига булмасын өчен, яшен вакытында дөрес урынга качып торырга кирәк. Бу турыда Россиянең атказанган коткаручысы Сергей Щетенин Sputnik радиосына интервьюда сөйләгән. РИА Новости шул хакта хәбәр итте.

Җәйге яшен — гаҗәеп матур һәм бик куркыныч күренеш. Урман янгыннарының күбесе дә яшен аркасында килеп чыга. Табигатьтә ял итүче кешеләр өчен дә яшен сугу куркыныч. Коткаручы сүзләренчә, табигатьтә давылга очрасагыз, иминлек кагыйдәләрен үтәү кирәк.

«Якындагы корылмага кереп качыгыз. Бу — капиталь төзелгән биналар. Әгәр табигатьтә калсагыз, яшен вакытында аерым үсеп торган агачка ышыкланырга ярамый. Кырда булсагыз, түбәнлек яки чокыр табарга, шунда кереп чүгәләргә һәм башны куллар белән капларга кирәк. Үзегез белән тимердән эшләнгән әйберләр булса, аларны мөмкин кадәр читкәрәк ыргытыгыз», — ди Щетенин.

Машина да яшен вакытында качу урыны булырга мөмкин. Корпусы металл булуга карамастан, автомобиль яшен сугудан саклый, ди белгеч.

«Әгәр машинада барганда яшен башланса, аннан чыкмагыз. Машинагыз ныклап беркетелмәгән конструкцияләр, реклама такталары янында булмасын — шуны карагыз. Машина үзе шактый яхшы диэлектрик (изолятор) була. Аның покрышкаларының яшен сугудан саклау ихтималы зур. Машинада озын антенналар булмаса, яшен сукмаска мөмкин», — ди коткаручы.