Өйгә килгән кунаклар игътибар итә торган унөч әйбер
Кунак килгәч, әлбәттә инде, ул хуҗаның чисталыгын да, осталыгын да күзәтеп йөри.
Өйгә кергән кеше ишеккә игътибар итә. Ишектән тузанны, тапларны, кул эзләрен сөрткәләп, ишек төбендәге паласны чистартып тору хәерле. Бу турыда фактлар сайтында язылган.
Аяк киеме киштәсенә дә кунакларның күзе төшә. Бихисап аяк киеме өелеп торса, кунакларга бер дә ошамас.
Кунаклар өйдәге исне дә керүгә үк тоеп ала. Хуҗалар үз исенә ияләшә, аны сизми дә, ә менә кунаклар аны хәзер тоеп ала. Шуңа күрә өйне җилләтеп тору хәерле.
Кран һәм раковина — ванна бүлмәсендә күзгә ташлана торган урыннар. Сантехникадан су эзләрен, паста калдыкларын чистартып торырга онытмагыз.
Сабын нинди булуга карап, хуҗа турында фикер йөртәләр. Сабын калдыкларын яңа кисәкләргә алыштырырга онытмагыз. Сыек сабын сала торган савыт чиста булсын, чистартмасагыз — кунаклар килгәндә читкә алып куеп торыгыз.
Сөлгеләрнең чистасын элеп куегыз. Ваннада берничә җирдә әллә ничә сөлге эленеп торса, кунаклар кайсына кул сөртергә белмичә аптырар.
Тараклар үз урынында торсын. Теләсә кайда яткан чәчле тарак кунакларга ошамас.
Кухня өстәле — үзәк урында тора. Артык әйберләрне алып куегыз, өстен яхшылап сөртегез, уңайлы урындыклар тезәргә онытмагыз. Бик тәбәнәк диван яки табуреткалар кунакларга ошамас.
Стаканнарда таплар булмасын, кырыйлары китек савытларны ыргытыгыз.
Көзгеләрне чистартырга онытмагыз.
Диванда артык җәймәләрне алып куегыз, өйдә хайваннар булса, аларның йонын диваннан чистартырга онытмагыз.
Китап киштәләренә дә кунаклар игътибар итә. Тузанын сөртеп, китапларын матурлап тезеп куегыз. Андагы китапларга карап, хуҗа турында фикер туачак, басмаларның исемнәренә күз салыгыз.
Кунак көткәндә, вак-төякләргә игътибар итегез. Дарулар, чәч резинкалары, чеклар, чыбыклар, кремнар, шешәләр һәм башка әйберләр күренә торган урында ятмасын.
Тиз генә өй җыештыру өчен биш киңәш
Пычрак савыт-сабаны духовка яки савыт-саба юа торган машинага яшереп торып була.
Йокы бүлмәсе ишеген ябып куегыз.
Өй буйлап ташлап калдырылган кием-салымны буш кәрҗингә тыгып куегыз.
Меламинлы губка тапларны һәм пычракларны бик тиз чистартырга ярдәм итәр.
Өйдәге сасы исне бетерү өчен бер кәстрүлгә бер чокыр су, 3 аш кашыгы аш серкәсе салып, берничә минут кайнатып торыгыз. Аш серкәсе исне бетерә.