Өйдәге түшәм ишелеп төшкәч, уйнап йөри торган нәни бала һәлак булган
Бер хатын, ике баласын алып, бертуган апасының өенә кунакка килгән.
Ульяновск өлкәсенең Барыш районында шәхси йортта түшәм ишелгәннән соң, өч яшьлек малай һәлак булган. Бу турыда Россия Тикшерү комитетының Ульяновск өлкәсе буенча Тикшерү идарәсенең матбугат хезмәте хәбәр итте.
Фаҗига 8 гыйнварда көндез була. Бер хатын ике баласын ияртеп, бертуган апасына кунакка килә. 3 яшьлек малай белән 8 яшьлек кыз өйдә уйнап йөри. Шул чакта түшәм ишелеп төшә. Малай урында ук җан бирә, кыз бала имгәнә, аны хастаханәгә озатканнар.
Фаҗигадән соң җинаять эше ачылган.
Түшәме ишелгән йорт 1935 елда төзелгән. Биредә күп балалы гаилә яши. Ульяновск өлкәсе губернаторы Сергей Морозов кушуы буенча, зыян күргән гаиләләргә ярдәм итәчәкләр, балалы гаиләләрнең барысының да торак шартларын тикшерәчәкләр.