Өйдә газ баллоны шартлагач, хуҗа тәрәзәдән биш метрга очып чыккан
Хуҗабикә хәрабәләр астында калган.
Пермь өлкәсенең Кудымкар районындагы Кузьва авылында зур янгын булган. Биредәге бер өйдә газ баллоны шартлаган. Бу турыда «Вести» каналы хәбәр итте.
Баллон шартлагач, дулкын хуҗа ир-атны тәрәзәдән атып бәргән, ул биш метр чамасы очып барып төшкән. Аның хатыны хәрабәләр астында калган. Кунакка килгән ир-ат стенага барып бәрелгән. Өйгә ут капкан.
Ярдәмгә күрше ир-ат килеп җиткән. Ул имгәнгән кешеләрне урамга алып чыккан. Ике кешене хастаханәгә салганнар. Өй тулысынча диярлек янып беткән, диелә хәбәрдә.
