Язылучыларын алдаган инстаграмчыга җинаять эше ачканнар
Миллионнар җыеп качкан егетнең әтисе полиция хезмәткәре, Самараның транспортта Эчке эшләр министрлыгының икътисади иминлек бүлеге җитәкчесе булып эшли
Язылучыларын үзенең финанс пирамидасына җәлеп иткән өчен, Мәскәү блогерына карата җинаять эше ачканнар. 19 яшьлек инстаграм-инвестор язылучыларыннан дистәләрчә миллион җыйган һәм юкка чыккан. Бу турыда РЕН ТВ каналы хәбәр итте.
Бөтен ил буйлап меңнәрчә кеше Виталий Крикуновка ышанган һәм акчасыз калган. Соңрак бу аның чын исеме булмавы да ачыкланган. Чынлыкта 19 яшьлек блогерның исеме Рамазан Гаджиев. Аның әтисе полиция хезмәткәре, Самараның транспортта Эчке эшләр министрлыгының икътисади иминлек бүлеге җитәкчесе булып эшли.
Социаль челтәрләрдәге видеода яшь эшмәкәр ике атна эчендә кертемнәрне 60 процентка арттырырга вәгъдә итә. Уңышлы эшмәкәр образы ясау өчен, ул үзенең псевдо-бай тормышының фотоларын да күрсәтеп тора. Кыйммәтле машиналар, зиннәтле аппартаментларны видеога төшереп куя. Ул командасы белән Мәскәү-Ситидагы офиста эшләвен дә күрсәтә. Ләкин болар барысы да тамаша гына була. Язылучылар егеткә ышанып, кредитлар ала. Шулай итеп алар зур бурычларга бата. Гаджиев исә миллионнарны җыеп, әти-әнисе янына Самарага кача, хәзер аны эзләү бара, диелә хәбәрдә.
