Зур резонанс уяткан «Фәхрине үтереп ташладылар» романы, шулай ук Тукай премиясенә дәгъва кылган «Абага алмасы ачы була» спектакле авторы Равил Сабыр эшеннән китүе турында хәбәр итте. «Сау булыгыз, нефтьче дуслар! Әле очрашырбыз, Җир түгәрәк», – дип язган ул социаль челтәрдә. «Шәһри Чаллы» Равил әфәнде белән элемтәгә кергән.
«Ял итәм әле 1-2 ай, аннары күз күрер», – дигән ул журналистка.
27 гыйнварда Равил Сабырга 50 яшь тулды. Бу уңайдан «Мәйдан» журналы Чаллы татар дәүләт драма театрында язучы белән очрашу оештыра. «Шигъри мәйдан» 31 гыйнварда 14:00 сәгатьтә башланачак, дип яза газета сайты.
Искәртергә кирәк: Равил Сабыр 2012 елда Чаллы татар дәүләт драма театрының әдәби бүлеген җитәкләде. 2015 елдан Әлмәттә яши, «Татнефть» акционерлык җәмгыятенең «Нефтяные вести» газетасының баш мөхәррире булып эшләде. Аннары «Татнефть»нең мәгълүмати сәясәт идарәсенең эчке багланышлар бүлеге җитәкчесе вазыйфасын башкарды.