Язучы Мәдинә Маликова сәяхәткә җибәрмәгән өчен иреннән аерылган
Татар дөньясында беренчеләрдән булып роман язучы ханым беренче ире белән 9 ел бергә яшәгән.
ТНВ каналында Зәмирә Рәҗәпованың «Әй язмыш, язмыш» тапшыруында күренекле татар язучысы, драматург Мәдинә Маликова беренче иреннән ни өчен аерылуы турында сөйләде.
Язучы ханым «Чаян» журналында эшләгән вакытта хезмәттәшенә кияүгә чыккан. Аларның уллары туган.
«9 ел яшәгәч, беренче ирем белән аерылдык. Сәбәбе — бик көлке. Ул вакытта журналистларны пароходта Идел буйлап сәяхәтләргә җибәрәләр иде. Иремне җибәрдем, үзем бала белән калдым. Аннары тагын сәяхәт оештырдылар, бу юлы Ленинградка сәяхәт. Мин язылып кайттым. Син бардың инде, хәзер мин барам, дидем иремә. Ә ул бармыйсың, диде. Менә китте ызгыш-талау, гауга. Ул җибәрмәгәч, мин бармадым инде. Шуңа җавап итеп аерылдым. Бер бүлмәле фатирыбыз бар иде. Миңа шул вакытта ике бүлмәле фатир бирделәр. Шул ике бүлмәле фатирга күчтем дә куйдым. Ул бер бүлмәле фатирда калды», — дип җиңел генә сөйләде тормыш авырлыклары турында язучы.
Мәдинә Маликова икенче ире Әхмәт Рәшит белән 45 ел бергә яшәгән (ире узган ел вафат булды). Уртак уллары бар, ул Казанда яши. Беренче улы гаиләсе белән Канадада яши.