Яшел Үзәндә ярышта Башкортстан спортчысы оекчан килеш өч километр йөгергән
Илнар аяк киемен кулына тота һәм өч километр йөгерә.
Яшел Үзәндә триатлон буенча Россия кубогына ярышта гадәттән тыш хәл булган. Бу турыда Башкортстанның Триатлон федерациясенең матбугат хезмәтенә сылтама белән «Башинформ» язды.
Башкортстан спортчысы Илнар Хәбибуллин стартка чыккач ук, аяк киеменең шнурлары өзелә. Илнар аяк киемен кулына тота һәм оекчан гына өч километр йөгереп уза.
«Менә шулай итеп кардан чапты, 16 градус салкында. Илнар гаҗәеп характерын күрсәтте. Ул кардан яланаяк йөгереп кенә калмады, 18-19 яшьлек арасында ярышта җиңде», — диелә федерация хәбәрендә.