Яшел Үзәндә нәни баланы чүп савытына салган кешене эзлиләр - видео
Прокуратура вәкилләре ата-ана вазифаларын башкаруны һәм гаиләдә яшәү шартларын тикшерәчәк.
Яшел Үзән шәһәрендә бер ир-ат нәни баланы чүп савытына салып куйган мизгелне шаһитлар видеога төшереп алган. Хәзер бу кешенең шәхесен ачыклау эшләре бара. Татарстан прокурорының өлкән ярдәмчесе Руслан Галиев «Татар-информ» агентлыгына шул хакта хәбәр итте.
Әлеге кадрлар кичә социаль челтәрләрдә таралды. Видеода торак йорт ишегалды сурәтләнгән. Анда бер ир-ат чүп контейнерларын карап йөри, аннары соң нәни баланы шул савыт эченә төшерә. Алар чүп савытыннан нидер алырга маташкан булуы да ихтимал.
Яшел Үзән прокуроры видеодагы ир-атның һәм баланың шәхесен ачыкларга кушкан. Шуннан соң бу гаиләнең яшәү шартларын, ата-ананың баланы тәрбияләү буенча вазифаларын башкаруын тикшерәчәк. Кагыйдә бозулар ачыкланган очракта, тиешле чаралар күреләчәк, диелә хәбәрдә.