Яшел Үзәндә ир-ат җир астында күмелеп калып һәлак булган
Ирнең мәетен җир астыннан МЧС хезмәткәрләре казып алган.
"Татар-информ" хәбәр итүенчә, Яшел Үзәндә бер ир җир астында күмелеп калып үлгән.
Фаҗига хакында хәбәр 16.13 минутта килә. Идел буе фанер-мебель комбинаты янында кеше җир астында күмелеп калды, диелә.
Вокзал яны урамы янындагы чүплектә ике ир казынган. Алар төсле металл эзләгән дип фаразлана. Җир ишелеп, берсе күмелеп кала.
Бер сәгатьтән ирне казып алалар. Әмма ул инде үлгән була. Аның кем икәне ачыклана.
