Яшь кызны вәхшиләрчә үтереп, мәетен суыткычта саклаганнар
Ангелинаны вәхшиләрчә үтергәннәр, мәетен кисәкләргә бүлгәннәр, кисәкләрне пакетларга салганнар.
Пермь шәһәренең Киров районындагы йортларның берсендә суыткычта 21 яшьлек кыз мәете табылган. Бу турыда «Комсомольская правда» хәбәр итте.
Ангелина Т. югалу турында волонтерлар хәбәр тарата, алар кызны эзли башлый. Ангелинаны соңгы тапкыр 22 августта Пермьнең Свердловск районында күрәләр. «Лиза Алерт» эзләү төркеменең рәсми сайтында кызны эзләү тукталу турында 26 августта билгеле булды.
Танышлары сүзләренчә, Ангелина элеккеге сөйгән егете белән телефоннан сөйләшкән, аннары такси чакырткан һәм китеп барган. Шуннан соң кыз өйгә әйләнеп кайтмаган, туганнарының шалтыратуларына җавап бирмәгән, социаль челтәрләргә дә керми башлаган. Ангелинаның әти-әнисе полициягә гариза язган.
«Комсомольская правда» үз чыганагына сылтама белән хәбәр иткәнчә, кыз югалып өч тәүлек узгач, аның мәете бер фатирда табыла. Ангелинаны вәхшиләрчә үтергәннәр, мәетен кисәкләргә бүлгәннәр, кисәкләрне пакетларга салып, суыткычка яшереп куйганнар.
Җинаятьтә шикләнеп 25 яшьлек егетне Пермь өлкәсе территориясендә тоткарлаганнар. Бу егет психиатрда күзәтүдә булган, махсус оешмада берничә тапкыр дәваланган.
Россия Тикшерү комитетының Пермь крае буенча Тикшерү идарәсе «Үтерү» маддәсе буенча җинаять эше ачкан. Җинаятьтә шикләнелүчене Нытвенский районындагы авылларның берсендә туганнарында тапканнар. «25 егет гаебен танып күрсәтмәләр бирде. Ул 21 яшьлек таныш кызын үтерүен таный», — дигән тикшерүчеләр.
Җинаять эшен тикшерү дәвам итә.
«Вести» каналы биредә яшәүчеләрнең сүзләренә сылтама белән хәбәр иткәнчә, Ангелина бу егет белән өч ел элек аерылышкан. Егет аны эзәрлекләп йөргән, еш шалтыраткан һәм янаган булган.