Яшь калу өчен нишләргә кирәк?

40 яшькә күпчелек кешеләрнең көндәлек гадәтләре формалашырга өлгерә. Гадәтләрнең кайберләре файдалы, кайберләре сәламәтлеккә һәм матурлыкка зыян сала. Белгечләр фикеренчә, гадәтләрне үзгәртергә була икән. Әгәр 21 көн дәвамында нинди дә булса гамәлне үтәсәң, ул даими гамәлгә әвереләчәк икән.

Төнге уникегә кадәр йокларга ятарга

Бу вакытта йокы аеруча файдалы дип санала, аны хәтта «матурлык йокысы» дип атыйлар. Шуңа күрә үз режимыңны үзгәртеп корырга, эшләрнең бер өлешен иртәнгә күчерергә яки, гомумән, ял көннәренә кичектерергә һәм 22-23 сәгатьләрдә йокларга өйрәнергә кирәк.

Су эчәргә

Кайбер хатын-кызлар су эчми. Алар чәй яки кофега өстенлек бирә. Бу эчемлекләр организмнан сыеклыкны чыгара, ягъни, сусызландыра. Әгәр су эчә алмыйсыз икән, ромашкалы чәйгә күчәргә кирәк. Составында кофеин булмаган башка үлән чәйләрен дә кулланырга мөмкин.

Җәяү йөрү

Машинасы булган кешеләр бик сирәк җәяү йөри. Сәламәтлекне саклап калу һәм физик форманы саклау өчен, җәяү йөрергә кирәк. Үзегезне эшкә булса да җәяү йөрергә өйрәтегез.

Тагын бер файдалы гадәт — лифтка утырмау. Лифтка утырмыйча, баскычтан менү яки төшү менә дигән тренировка була.

Кояштан саклый торган крем куллану

Җәй көне ялда күпчелек кешеләр кояштан саклаучы крем кулланалар. Ә менә гадәти тормышта күпләр бу кагыйдә турында оныта. Ә тирене ультрашәмәхә нурлардан кышын да сакларга кирәк. Әлбәттә, кыш өчен җәйге кремнар кирәкми. Урамга чыгар алдыннан кояштан саклый торган косметика кулланырга күнегергә кирәк.

Борчылмаска өйрәнергә

Тормышыбыз стрессларга бай. Стресс — ул сәламәтлек һәм матурлыкның беренче дошманы. Вак — төяк вакыйгалар өчен борчылмаска өйрәнергә кирәк. Әйтергә кирәк, бу җиңел булмаячак.

Психолог белән эшләү ярдәм итә ала. Бу мөмкин түгел икән, медитация ясарга өйрәнергә кирәк. Көн саен медитация ясау тигез кәефне сакларга ярдәм итәчәк.