Яшь ир-ат хатынының хыянәтен белгәч, сөяркәсенең күкрәгенә аткан
Уфада хыянәт аркасында җинаять булган.
УФада ир белән хатын арасындагы хыянәт җинаятькә китергән. Бу турыда «Башинформ» агентлыгы Башкортстан буенча Эчке эшләр министрлыгына сылтама белән хәбәр итте.
Уфаның Ленин районында ике ир-ат арасында конфликт аркасында ату коралы кулланганнар.
Якынча версия буенча, 26 яшьлек ир үзенең хатыны 27 яшьлек башка ир белән очрашып йөрүен белеп ала. Ул хыянәт турында ишеткәч, бик нык ярсый һәм көндәшенә шалтырата. Алар очрашалар.
«Ирләр икесе дә очрашуга иптәшләре белән килә. Сөйләшкәндә алар талаша ук башлый. Шул чакта ирләрнең берсе травматик пистолеттан һавага ата, аннары көндәшенә ата. Аның күкрәге имгәнә», — дип хәбәр ителә.
Полиция хезмәткәрләре конфликтта катнашучыларны кулга ала. Җинаять эше ачылган, тикшерү эшләре бара.