Диетолог Ильдефонсо Санчес Каро белдергәнчә, яшелчә һәм җиләк-җимешләр белән агуланмас өчен, аларны билгеле бер тәртиптә юарга кирәк. Дөрес ысулны ул «Infosalus» басмасы белән интервьюда сөйләгән, дип яза Lenta.ru.
Каро билгеләп үткәнчә, җиләк-җимеш һәм яшелчәләрне агып торган су астында юарга, шул ук вакытта аларның кабыгына зыян китермәскә кирәк. «Әгәр сез аларны әрчергә җыенсагыз да, аларны юганда, кабыгына зыян китермәү мөһим. Бу – кабыктагы зыянлы матдәләрне җиләк-җимеш һәм яшелчәләрне кискәндә, эченә кертмәс өчен кирәк», – дип аңлатты белгеч.
Кавын, кыяр, карбыз һәм каты кабыклы башка җиләк-җимеш һәм яшелчәләрне юганда, диетолог щетка да кулланырга киңәш итә. Моннан тыш, Каро бу максатлар өчен махсус химик сыеклык сатып алырга тәкъдим итте, ләкин башта аның составын җентекләп өйрәнергә һәм анда зарарлы матдәләр юкмы икәнен тикшерергә кирәк. Ахырдан җиләк-җимеш һәм яшелчәләрне чиста сөлге белән киптерергә кирәк, дип йомгаклады эксперт.