Яшел Үзәндә урамда йөрүче ир-атлар һәм бала өстенә түбәдән кар ишелеп төшкән. Әлеге хәлне видеокүзәтү камерасы төшереп алган. Бу турыда «Татарстан 24» телеканалы хәбәр итте.
Социаль челтәрләрдә таралган видео кадрларыннан күренгәнчә, 3 кеше бина яныннан бара. Алар үзләренә куркыныч янаганын абайламый. Шул чакта кисәк кенә түбәдән кар төшә. Ир-атлар тиз арада кар астыннан чыга, баланы казып чыгарырга туры килә, диелә хәбәрдә.
Яшел Үзән районы прокуратурасы тикшерү оештырган. Бу турыда Татарстан прокурорының өлкән ярдәмчесе Руслан Галиевка сылтама белән «Татар-информ» яза.
Тикшерү нәтиҗәләре буенча «кулланучыларның тормыш һәм сәламәтлек иминлеге таләпләренә җавап бирми торган хезмәтләр күрсәтү» турында җинаять эше ачылган.
Видео «Татарстан 24» каналында чыкты.