Татарстанда 10 яшьлек малае һәлак булган өчен, әтисен хөкем иттеләр. Бу турыда «Татар-информ» Татарстан прокуратурасының рәсми вәкиле Руслан Галиевка сылтама белән хәбәр итте.
Суд ир-атка карата хөкем карары чыгарды. 40 яшьлек ир-ат баласы үлемендә гаепле дип табылды.
Фаҗига 26 июльдә Яшел Үзәннең Дубровка бистәсендә була. Ир-ат улын багги руленә утырта. Малай иминлек каешын эләктерми. Ул идарәсен югалта, багги әйләнеп каплана. Егылгач, малай бик нык имгәнә һәм үлә.
Суд ир-атны «Саксызлык аркасында үлемгә китерү»дә гаепле дип таба. 1,5 елга мәҗбүри эшләргә һәм хезмәт хакының 10 процентын дәүләт хисабына тотып калуга хөкем итә, диелә хәбәрдә.
